SEMANA 1ª DO ADVENTO
175.- LUNS
PRIMEIRA Is 2, 1-5:
Congrega o Señor a tódalas nacións para paz eterna do reino de Deus
PROCLAMACIÓN DA PALABRA RECOLLIDA NA PROFECÍA DE ISAÍAS
2 1Palabras que en visión profética recibiu Isaías, fillo de Amós, acerca de Xudá e
Xerusalén:
2Vede: á fin dos días será creado o monte da Casa do Señor.
Vede: será levantado por enriba dos montes e máis cós petoutos,
xuntaranse nel tódalas xentes.
3Irán a el pobos numerosos que dirán:
"Vinde, subamos ó monte do Señor, á casa do Deus de Xacob,
para que nos mostre os seus camiños, e camiñemos polos seus vieiros.
Vede: de Sión sairá a Lei, a Palabra do Señor sairá de Xerusalén".
4Xulgará os preitos entre as xentes, decidirá o que é xusto entre os pobos.
Coas espadas forxarán arados; coas lanzas, podadeiras.
Non levantará un pobo contra outro a espada,
nin aprenderán de novo a face-la guerra.
5¡Casa de Xacob, ven; vaiamos
e camiñemos á luz do Señor!
Ou, ad libitum, cando no ano A ésta se proclama no 1º domingo de advento: Is 4, 2-6
Exultarán de alegría cantos sean salvados
PROCLAMACIÓN DA PALABRA RECOLLIDA NA PROFECÍA DE ISAÍAS
2O día aquel o retoño do Señor servirá de honra e gloria;
e o froito da terra será o orgullo e honor dos escapados de Israel.
3Entón o que quede en Sión, e o resto de Xerusalén chamarase santo.
Si, todo el será inscrito en Xerusalén no libro da vida.
4Cando o Señor limpe a sucidade das fillas de Sión,
e cando lave do medio de Xerusalén o seu sangue,
cun vento de xuízo e cun vento de desolación.
5Entón o Señor sobre o templo do monte de Sión
e sobre a súa xuntanza creará de día unha nube;
e de noite, fume e labarada esplendente
coma un dosel sobre a Gloria do Santuario.
6Unha tenda que será sombra para o día contra a seca
e refuxio e cuberto contra o trebón e maila chuvia.
SALMO RESPONSORIAL Sal 121, 1-2. 3-4a- (4b-5. 6-7.) 8-9
R/ (cf 1): Imos alegres para a casa do Señor.
Alegreime, cando me dixeron:
imos para a casa do Señor.
2Xa están os nosos pés
ás túas portas, Xerusalén,
3Xerusalén, cidade ben feita,
de compacta harmonía.
4Alá soben as tribos, as tribos do Señor,
conforme o costume de Israel,
para festexa-lo nome do Señor.
5Alí están os tribunais da xustiza,
a sede da casa de David.
6Saudade así a Xerusalén:
-"Teñan prosperidade os que te queren,
7que haxa paz nos teus muros
e contento nos teus pazos".
8Por mor de meus irmáns e compañeiros
direi eu: -"A paz contigo".
9Por mor da casa do Señor, o noso Deus,
deséxoche todo ben.
ALELUIA Cf. Sal 79, 4:
Vén a liberarnos, Señor noso Deus;
móstrano-lo teu rostro, e salvarémonos
EVANXEO Mt 8, 5-11
Chegarán moitos de oriente e occidente para entrar no reino dos ceos
PROCLAMACIÓN DO SANTO EVANXEO SEGUNDO MATEO
5O entrar Xesús en Cafarnaúm achegóuselle un centurión que lle suplicou 6dicindo:
-Señor, o meu criado xace tolleito na casa e padece moito.
7Díxolle Xesús:
-Eu irei e curareino.
8Replicoulle o centurión:
-Señor, non son merecente de que entres baixo o meu teito, abonda cunha palabra túa
para que o meu criado cure. 9Que eu, anque son un subordinado, tamén teño homes
baixo as miñas ordes; e dígolle a este: "vai", e vai; a aqueloutro: "ven", e vén; e ó meu
criado: "fai isto", e faino.
10A Xesús chamoulle moito a atención oír aquilo, e díxolles ós que o seguían:
-Asegúrovos que non atopei a ninguén cunha fe tan grande en todo Israel. 11E dígovos
que moitos de oriente e mais de occidente virán sentar na mesa de Abraham, Isaac e
Xacob, no Reino dos Ceos.
176.- MARTES
PRIMEIRA Is 11, 1-10
Descansará sobre el o Espírito do Señor
PROCLAMACIÓN DA PALABRA RECOLLIDA NA PROFECÍA DE ISAÍAS
11 1Sairá un retoño do pé da árbore de Ixaí
e un gromo brotará da súa raíz.
2Descansará sobre el o Espírito do Señor,
espírito de sabedoría e discernimento,
espírito de consello e fortaleza,
espírito de ciencia e temor do Señor.
3Sentirá a súa compracencia no temor do Señor.
Non xulgará conforme a aparencia dos seus ollos,
nin sentenciará conforme as faladurías dos seus oídos.
4Xulgará ó pobre conforme a xustiza,
e sentenciará con rectitude ós oprimidos da nación.
Castigará ó violento coa vara da súa boca,
e co espírito dos seus labios matará ó malvado.
5Será a xustiza o cinguidor da súa cintura
e a fidelidade o cinguidor do seu lombo.
6O lobo habitará co carneiro
e o leopardo deitarase co cabrito;
o becerro e o leonciño pacerán xuntos:
un meniño pequeno sacaraos ó pasto.
7A vaca e a osa pacerán xuntas, xuntas deitaranse as súas crías;
o león, o mesmo có boi, comerá palla.
8Un meniño de leite xogará no tobo da cobra,
e un neno destetado collerá a víbora coa súa man.
9Ningún será malvado nin fará o mal en todo o meu monte santo:
o país estará cheo de coñecemento do Señor,
o mesmo que as augas enchen o mar.
10Sucederá o día aquel que a raiz de Ixaí estará ergueita de bandeira das nacións,os
pobos procurarana, e a gloria será o seu lugar de descanso.
SALMO RESPONSORIAL Sal 71, 2 . 7-8. 12-13. 17
R/ (cf 7): Florecerá a xustiza nos seus días,
e unha paz abundante para sempre
2Que rexa ó teu pobo rectamente
e ós teus pobres con equidade.
7Florecerá a xustiza nos seus días,
unha prosperidade duradeira como a lúa.
8Dominará de mar a mar,
desde o gran río ata o cabo da terra.
12El librará ó pobre que suplica,
ó aflixido que está sen axuda.
13Terá piedade dos febles e indixentes,
salvará a vida dos pobres;
17Que o seu nome dure por sempre
e a súa sona igual có sol.
Que se bendigan nel tódolos pobos
e que o proclamen ditoso.
ALELUIA:
Velaí que o noso Señor virá con poder,
e iluminará os ollos dos seus servos
EVANXEO Lc 10, 21-24
Exulta Xesús co gozo do Espírito Santo
PROCLAMACIÓN DO SANTO EVANXEO SEGUNDO LUCAS
21Xesús exclamou cheo de gozo do Espírito Santo:
-Bendito sexas, Pai, Señor do ceo e mais da terra, porque lles agachaches estas cousas ós
sabios e prudentes, e llas revelaches á xente humilde. Si, meu Pai, bendito sexas por che
agradar iso así.
22Meu Pai ensinoume tódalas cousas, e ninguén coñece ó Fillo a non se-lo Pai, nin
coñece ó Pai a non se-lo Fillo, e aquel a quen o Fillo llo queira revelar.
23E volvéndose ós discípulos, díxolles á parte:
-Benia os ollos que ven o que vós vedes. 24Porque é ben certo que moitos profetas e reis
arelaron ve-lo que vós vedes, e non o viron; e oí-lo que vós oídes, e non o oíron.
177.- MÉRCORES
PRIMEIRA Is 25, 6-10a
O Señor convida ós seu convite e enxuga as bágoas de tódolos rostros
PROCLAMACIÓN DA PALABRA RECOLLIDA NA PROFECÍA DE ISAÍAS
6Nesta montaña o Señor dos Exércitos ofreceralles a tódolos pobos
un banquete de boas talladas, de viños anellos,
carnes ben condimentadas, viños refinados.
7Destruirá nesta montaña o veo que tapa a tódolos pobos, a cuberta que cobre a tódalas
nacións.
8O meu Señor, Deus dos Exércitos, destruirá a morte para sempre,
enxugará as bágoas de tódalas caras,
afastará de todo o país a vergonza do seu pobo.
Si, díxoo o Señor.
9No día aquel dirase:
"Ollade, este é o noso Deus, esperamos nel: El hanos salvar.
Este é o Señor, esperamos nel, gozaremos e alegrarémonos coa súa salvación".
10Si, a man do Señor descansa sobre esta montaña
SALMO RESPONSORIAL Sal 22, 1-3a. 3b-4. 5. 6
R/ (6cd): Eu habitarei na casa do Señor
ó longo dos meus días.
O Señor é o meu pastor: nada me falta.
2Os pastos verdecentes lévame a repousar,
lévame a beber ás augas tranquilas:
3El repón as miñas forzas.
Guíame por vereas rectas,
por mor do seu nome.
4Se tiver de pasar por vagoadas sombrizas,
ningún mal temería, pois ti vas comigo:
o teu bastón e o teu caxato son o meu sosego.
5Ti pos para min a mesa,
á cara dos meus inimigos;
únxesme con perfume a cabeza,
e a miña copa reborda.
6A túa bondade e o teu amor vanme seguindo
tódolos días da vida.
Eu habitarei na casa do Señor
ó longo dos meus días.
ALELUIA:
Velaí vén o Señor para salva-lo seu pobo,
ditosos os que están preparados para saírlle ó encontro
EVANXEO Mt 15, 29-37:
Xesús sana a moitos e multiplica os pans
PROCLAMACIÓN DO SANTO EVANXEO SEGUNDO MATEO
29Marchou Xesús e chegou onda o mar de Galilea. Subiu a un monte e sentou alí. 30E
veu a pé del un mundo de xente, traendo consigo coxos, cegos, eivados, xordos e outros
moitos; botábanos ós pés de Xesús e el curábaos a todos. 31De xeito que a xente ficaba
pasmada vendo os mudos falar, curados os eivados, os coxos andar e os cegos ver; e
glorificaban ó Deus de Israel.
32Chamou Xesús polos seus discípulos e díxolles:
-Dáme pena esta xente: hai tres días que veñen tras miña e non teñen que levar á boca.
Non os quero despedir sen tomaren nada, porque poderían esmorecer polo camiño.
33Dixéronlle os discípulos:
-¿E de onde imos sacar, nun lugar deserto, pan abondo para fartar tanta xente?
34Pero el preguntoulles:
-¿E logo, cantos pans tedes?
Eles responderon:
-Sete e mais algúns peixes.
35Mandou que a xente sentase no chan; 36despois colleu os sete bolos e mailos peixes,
rezou a acción de gracias, partiunos e déullelos ós seus discípulos; e os discípulos
dábanllos á xente. 37Comeu a xente a se fartar, e cos anacos que sobraron encheron sete
cestas. 38Os que comeron eran uns catro mil homes, sen
178.- XOVES
PRIMEIRA Is 26, 1-6
Que entren os xustos que gardan a fe
PROCLAMACIÓN DA PALABRA RECOLLIDA NA PROFECÍA DE ISAÍAS
26 1No día aquel cantarase este cantar no país de Xudá:
"Temos unha vila forte, El ponlle de defensa parede e muralla.
2Abride as portas e que entre un pobo xusto, que garde a fidelidade.
3Con plan firme ti créa-la felicidade dos que confían en ti.
4Confían no Señor para sempre, si, no Señor;
o Señor é Rocha para sempre.
5Pois abate os habitantes da altura, á cidade alta faina abaixar,
faina abaixar ata a terra, déixaa estrada no po.
6Pisarana os pés; os pés do oprimido, as pisadas do pobre".
SALMO RESPONSORIAL SaL 117, 1 e 8-9. 19-21. 25-27a
R/ (26a): Bendito o que vén no nome do Señor
Ou: Aleluia
1Louvade o Señor porque é bo,
porque o seu amor é eterno.
8Mellor é acollerse ó Señor
que fiarse dos homes.
9Mellor é acollerse ó Señor
que fiarse dos grandes.
19Abrídeme as portas da victoria:
quero cantar e dar gracias ó Señor.
20Esta é a porta do Señor:
os xustos entran por ela.
21Douche as gracias porque me escoitas:
ti e-la miña salvación.
25¡Ai, Señor, dáno-la salvación!
¡Ai, Señor, dános prosperidade!
26Benditos os que veñen no nome do Señor:
bendicímosvos desde a casa do Señor.
27O Señor é Deus: El dáno-la luz.
ALELUIA Is 55, 6:
Buscade ó Señor, mentres podedes encontralo,
invocádeo, mentres está cerca
EVANXEO Mt 7, 21. 24-27:
Quen fai a vontade do Pai entrará no reino dos ceos
PROCLAMACIÓN DO SANTO EVANXEO SEGUNDO MATEO
Dilles Xesús ós seus discípulos:
21Non todo o que me di: "¡Señor! ¡Señor!" entrará no Reino dos Ceos, senón o que fai a
vontade do meu Pai celestial.
24Así pois, todo aquel que escoita as miñas palabras e as pon en práctica será coma o
home asisado que edificou a súa casa sobre rocha. 25Caeu a chuvia, veu a riada, bruou o
vendaval batendo na casa; pero non se derrubou porque estaba asentada na rocha.
26Mais todo o que escoita as miñas palabras e non as leva á práctica, pórtase coma un
tolambán que edificou a súa casa sobre area. 27Caeu a chuvia, veu a riada, bruou o
vendaval, e batendo na casa derrubouna, sendo grande a desfeita.
179.- VENRES
PRIMEIRA Is 29, 17-24:
Entón verán os cegos
PROCLAMACIÓN DA PALABRA RECOLLIDA NA PROFECÍA DE ISAÍAS
Di o Señor:
17Velaí: dentro dun pouco, ben pouquiño,
o Líbano converterase nun verxel
e o Carmelo será considerado un bosque.
18No día aquel os xordos oirán a lectura dun rolo
e desde a escuridade e as tebras os ollos dos cegos verán.
19Entón os pobres aínda se alegrarán máis no Señor,
e os campesiños miserables brincarán de gozo polo Santo de Israel,
20porque se acabará o tirano, desaparecerá o burlón,
e tódolos que intentan face-la iniquidade serán exterminados:
21os que declaran culpable a un home con calumnia,
e poñen lazos ós que deciden nas portas da cidade
para botaren o inocente ó deserto.
22Por isto así fala acerca da casa de Xacob
o Señor Deus, o que redimiu a Abraham:
"xa non se avergonzará Xacob, xa non virará branca a súa cara,
23porque cando vexa no medio del os seus fillos, froito das súas entrañas,
eles santificarán o meu Nome".
Santificarán o Santo de Xacob e revenciarán o Deus de Israel.
24Entón os de espírito extraviado coñecerán o que é ter siso,
e os murmuradores aprenderán a instrucción que se lles dá.
SALMO RESPONSORIAL Sal 26, 1 . 4. 13-14
R/ (1a): O Señor é a miña luz e salvación
O Señor é a miña luz e salvación,
¿a quen hei de temer?
O Señor é o meu castelo,
¿ante quen hei de tremer?
4Unha cousa pídolle ó Señor,
unha cousa procuro:
habitar na casa do Señor,
tódolos días da vida,
para gozar da dozura do Señor,
visitando o seu templo.
13Eu espero gozar dos bens do Señor
na terra da vida.
14Espera no Señor;
ten corazón forte e valente
e espera no Señor.
ALELUIA:
Velaí vén o noso Señor con poder,
e iluminará os ollos dos seus servos
EVANXEO Mt 9, 27-31:
Por creren en Xesús dous cegos son curados
PROCLAMACIÓN DO SANTO EVANXEO SEGUNDO MATEO
27Cando saíu Xesús, fórono seguindo dous cegos que berraban:
-Fillo de David, ten dó de nós.
28E ó entrar na súa casa, os cegos achegáronselle. Preguntoulles Xesús:
-¿E vós credes que eu podo facer iso?
Responderon:
-Cremos.
29Entón tocóulle-los ollos, dicindo:
-Fágase conforme a vosa fe.
30E abríronselle-los ollos. Logo avisounos moi serio:
-¡Mirade que non o saiba ninguén!
31Pero, mal se foron, déronlle unha grande sona por toda aquela terra.
180.- SÁBADO
PRIMEIRA Is 30, 19-21. 23-26
Con misericordia apiadareime de ti, cando clames amin
PROCLAMACIÓN DA PALABRA RECOLLIDA NA PROFECÍA DE ISAÍAS
Di o Señor, Deus Santo de Israel:
19Ai, pobo de Sión, que habitas en Xerusalén, non chores máis:
o seu favor acollerá o teu berro de auxilio;
cando El o escoite, responderache;
20o Señor darache o pan na hora da angustia e auga na hora do asedio;
e o que che dá a chuvia non volverá a marchar,
os teus ollos volverano a ver,
21os teus oídos escoitarán unha palabra:
"Este é o vieiro, camiñade por el",
cando vos desviedes para a dereita e cando vos desviedes para a esquerda.
23Entón daralle a chuvia para a sementeira que sementaches na túa terra,
e o gran, producto da túa terra, será abundante e gordo.
No día aquel o teu rabaño pacerá en pasteiros anchos,
24e os bois e os burros que aren a túa terra,
comerán forraxe ben sazonada, aventada coa galleta e a forquita.
25Sobre todo monte alto e todo outeiro erguido
haberá auga, correrá a regos,
no día da grande matanza, cando caian as torres.
26Entón a luz da lúa será coma a luz do sol
e a luz do sol será sete veces maior,
cando o Señor sande a ferida do seu pobo
e cure a chaga do seu castigo.
SALMO RESPONSORIAL Sal 146, 1-2. 3-4. 5-6
R/ (Is 30, 18): Ditosos todos cantos esperan ó Señor
1Louvade o Señor,
pois é bo cantarlle ó noso Deus;
a louvanza élle debida.
2O Señor reconstrúe Xerusalén
e reúne os dispersos de Israel.
3Sana os corazóns quebrados
e venda as súas feridas.
4Conta as estrelas sen número
e chama a cada unha polo nome.
5O noso Señor é grande e poderoso,
para a súa sabedoría non hai medida.
6O Señor ergue os humildes
e abaixa no chan os malvados.
ALELUIA Is 33, 22:
O Señor noso xuiz, noso lexislador, noso rei:
el hanos salvar
EVANXEO Mt 9, 35 - 10, 1. 6-8
Vendo á xente, tivo compaixón dela
PROCLAMACIÓN DO SANTO EVANXEO SEGUNDO MATEO
35Xesús percorría tódalas vilas e aldeas ensinando nas sinagogas, anunciando a Boa
Nova do Reino e curando toda enfermidade e doenza. 36Pero, vendo a multitude, sentiu
unha fonda compaixón por ela, porque estaban todos derreados e esmorecidos coma
ovellas sen pastor. 37Entón díxolles ós discípulos:
-A anada é ben boa, pero os xornaleiros son poucos; 38así que rogádelle ó dono da
colleita que mande xornaleiros á súa ceifa.
10 1E chamando ós doce discípulos, deulles poder para botaren os espíritos malos e
curaren toda enfermidade e doenza.
6Ide máis ben ás ovellas perdidas da casa de Israel. 7E mentres camiñades proclamade
que xa chega o Reino dos Ceos. 8Curade enfermos, resucitade mortos, limpade gafos,
botade os demos fóra. E xa que de balde recibistes, dade de balde tamén.