SALMO

SALMOS (recomendados a elixir):

Salmo 127 (128). 1-2. 3. 4-5 ac y 6a. / Salmo 144 (145). 8-9. 10 y 15. 17. 18. /  

Salmo 148. 1-2. 9-10. 11-13ab. 13c-14a.

 Sal 127, 1-2. 3. 4-5

R/.  (cf 1):  Ditosos os que temen o Señor.

Ou:  (4):  Así será bendito quen teme o Señor.

Ditosos os que temen o Señor,

os que seguen os seus camiños.

Comerás do traballo das túas mans,

serás ditoso, serás afortunado.

A túa muller coma parra fecunda

no interior da túa casa;

os teus fillos coma gromos de oliveira

arredor da túa mesa.

Así será bendito

o home que teme o Señor.

Que o Señor te bendiga desde Sión,

que goces coa prosperidade de Xerusalén

todos os días da túa vida.

Sal 144, 8-9. 10 e 15. 17-18

R/  (9a):  O Señor é agarimoso con todos.

O Señor é clemente e compasivo,

tardo á ira e rico en misericordia.

O Señor é bo para todos,

agarimoso con todas as súas obras.

Que te loen, Señor, as túas obras,

e te bendigan os teus amigos.

Os ollos de todos están postos en ti,

e dáslles o sustento ao seu tempo.

O Señor é xusto en todos os seus camiños,

e santo en todas as súas obras.

O Señor está cerca dos que o chaman,

dos que o chaman con sinceridade.

Sal 148, 1-2. 3-4. 9-10. 11-13. 13c-14a

R/  (13a):  Loen o nome do Señor

Ou: Aleluia.

Loade o Señor desde o ceo,

loádeo alá nas alturas.

Loádeo, os seus anxos,

loádeo, os seus exércitos.

Loádeo, sol e mais lúa,

loádeo, lucentes estrelas.

Loádeo, os ceos dos ceos,

e as augas dos espacios celestes.

Montes e todos os outeiros,

árbores froiteiras e mais cedros,

feras e gando todo,

réptiles e paxaros alíxeros,

Os reis e todas as nacións,

os príncipes e os xuíces da terra,

os mozos e mailas doncelas,

os vellos e mailos neniños.

Loen o nome do Señor,

o único nome que é excelso.

A súa maxestade cobre a terra e mailo ceo;

el ergue a cabeza do seu pobo.