Domingo 7 de Pascua

DOMINGO VII DA PASCUA

                As seguintes lecturas usaranse onde a Ascensión do Señor se celebrou o xoves da semana VI do tempo pascual.

Primeira Lectura      Feit 7, 55-60

Vexo o Fillo do Home, de pé, á dereita de Deus

LECTURA DO LIBRO DOS FEITOS DOS APÓSTOLOS

                Naqueles días, Estevo, cheo do Espírito Santo e cos ollos cravados no ceo, viu a gloria de Deus e a Xesús de pé á dereita de Deus, e dixo:

                — Ollade, vexo o ceo aberto e o Fillo do Home, de pé, á dereita de Deus.

                Entón pegaron a berrar, taparon os oídos, e todos á xunta arremeteron contra el; quitárono fóra da cidade e comezaron a apedralo. As testemuñas deixaron os seus vestidos aos pés dun mozo chamado Saulo.

                Apedraban a Estevo, que invocaba así: "Señor Xesús, recibe o meu espírito!" E posto de xeonllos, berrou con voz forte:

                "Señor, non lles teñas en conta este pecado!"

                Dito isto, adormeceu para sempre.

                 Palabra do Señor                   R.: Grazas a Deus

SALMO RESPONSORIAL       

Sal 96, 1 e 2b. 6 e 7c. 9

R.: (1a e 9a): O Señor reina, o Altísimo sobre toda a terra.

Ou: Aleluia.

O Señor reina, alégrese a terra,

exulten todas as illas,

xustiza e rectitude sosteñen o seu trono.

Os ceos pregoan a súa rectitude

e todos os pobos contemplan a súa gloria.

Diante del axeónllanse os deuses.

Ti, Señor, es o Altísimo sobre toda a terra,

excelso máis ca todos os deuses.

Segunda Lectura      Ap 22, 12-14. 16-17. 20

Ven, Señor Xesús!

LECTURA DO LIBRO DA APOCALIPSE

                Eu, Xoán, oín unha voz que me dicía:

                Mira que vou chegar axiña e traio comigo a miña paga, para lle pagar a cada un conforme o seu traballo. Eu son o Alfa e o Omega, o Primeiro e o Derradeiro, o Principio e a Fin.

                Benia os que teñen lavada a súa roupa, para teren dereito á árbore da vida e a entraren polas portas da cidade.

                Eu, Xesús, mandeivos o meu anxo, para que vos dese testemuño de todo isto que se refire ás igrexas.

                Eu son o renovo e a descendencia de David, o luceiro brillante da mañá.

                O Espírito e a esposa din: "Ven".

Quen escoita, que diga: "Ven".

Quen teña sede, que veña;

o que queira, que colla de balde auga da vida.

                Quen testemuña estas cousas, di: "Si, veño axiña". Amén! Ven, Señor Xesús!

                               Palabra do Señor                                             R.: Grazas a Deus

ALELUIA    Cf. Xn 14, 18

Se non se canta, pódese omitir.

Aleluia, aleluia.

Non vos deixarei orfos, di o Señor:

voume e volverei onda vós e alegrarase o voso corazón.

Aleluia.

Evanxeo     Xn 17, 20-26

Que cheguen á perfecta unidade!

LECTURA DO SANTO EVANXEO SEGUNDO XOÁN

                Naquel tempo, elevando os ollos ao ceo, Xesús orou dicindo:

                —Pai santo, non che rogo só por estes, senón tamén polos que han de crer en min pola palabra deles; que todos sexan un, coma ti, Pai, en min, e eu en ti; que tamén eles sexan un en nós, para que o mundo crea que ti me mandaches.

                E a gloria que ti me deches déillela a eles, para que sexan un, coma nós somos un. Eu neles e ti en min, para que cheguen á perfecta unidade, de xeito que o mundo recoñeza que ti me mandaches e que os amaches a eles, como me amaches a min.

                Pai, os que me deches, quero que, onde estou eu, estean tamén eles comigo, para que contemplen a miña gloria, a que ti me concediches, porque me amabas xa antes da fundación do mundo.

                Pai xusto, o mundo non te coñeceu, pero eu coñecinte, e estes coñeceron que ti me mandaches. Eu manifesteilles o teu nome e seguiréillelo manifestando, para que o amor co que me amaches estea neles, e tamén eu estea neles.

                               Palabra do Señor                                             R.: Loámoste, Cristo